داعش.

إذا سقــسوك على داعــش ، عندي فيها قــــول منظم

الأمــة كـــــــانت سكـــــرانة وصحــــات بـــلا ما تــــتعلم

راها كي جات التسعينات ، وعاد الخوف اللي يحكم

الخلــــقا قالت كــي نسلك ـ ها نخلطها وربــــــي يرحم

بدات تحــــــوّل بالســــباّ واللــــي طاق على المال يْــلــــم

ولــــــــّى خيـّـك داير سكنا كيما جارو وخـــدم تِـــيدم

كــي عادوا ذوك الناس شباع ، حبوا يَطبعوا جيـــهتهم

قــــــالوا حنــــايا والله غالب ، بصح  لـــولاد نـقــــروهم

الولد نـــْـبت من مال حـْرام ، مبلوكي عقـــــلو ومــختتم

عايـــــش في النعــــما ما يقرا قـــــرآن ولا يعرف يحــــشم

شعــرو طالع  والحـــــزامة والـــــوا مـــــرخي ما يتـــــحزم

فـــوّت ساعة عندو شلــّة في السكرا والكيف معــلـّم

كـي فاق عــْرف بلّي غالط راح وسقسا جاهل يفـــهم

الخــصلة اللــــــــي يعرفــــوها : كافر ويحـــــلل ويحــــــــرّم

ما قــــدرش يعـــيش مع الفوضى وجماعتهم غيـر تقــدّم

خلـّـــــــوه وقالــــوا ذا بارود ..إذا وصّــل راهو منــــهم

وليــــا غــبـّر ما يعــــــرفوه ، والحـــــــوصلة راهـــو يــصدم

عشر سنين وزوّد عـــــامين ، و الـــزرّيـــــعة تشرب الدم

والدولة قـــالت هذا الــــدين سباب الهم نحــــــّي تسلـَـم

الدين منــــوّر من بكري. قــــولي ذا الجهل منـــــين يعــــــمّ